«Մեծ ու փոքր երեխաները …. կարծում են, թե կարող են փրկել կամ փոխել աշխարհը»

nunesargsyan«Նռան հատիկները», «Հերոսներ», «Վիշապ Նեսին», «Թզուկ Մզուկ» «Քաչալ ոզնին», «Թագավորն ու վիշապը»… Հայաստանի Հանրապետության նախագահ Արմեն Սարգսյանի տիկին, արվեստաբան, մանկագիր Նունե Սարգսյանը քսանից ավելի գրքերի հեղինակ է, որոնք հրատարակվել են հայերեն (նաև՝ արևմտահայերեն, հայկական բարբառներով), անգլերեն, ռուսերեն, ուկրաիներեն, վրացերեն, ուզբեկերեն: Նունե Սարգսյանի՝ մանկական գրքերի աշխարհում սպասվող նորությունների, գրքի հմայքի, մարդ-բնություն փոխհարաբերության և առհասարակ, մանուկների աշխարհի մասին է մեր զրույցը սիրված մանկագրի հետ:

— Գրել սկսել եք ուսանողական տարիների՞ց, հետաքրքիր է՝ ձեռագրային տարբերություն կա՞:  Ի՞նչն է ոգևորում, ստեղծագործության աղբյուր դառնում երիտասարդ տարիքում, ի՞նչը՝ հասուն տարիքում:

— Գրել սկսել եմ յոթ տարեկանից, դեռ դպրոցի գրական խմբակից։ Ստեղծագործել եմ երիտասարդության տարիներին, ստեղծագործում եմ մինչև հիմա, ընդ որում՝ ոչ միայն մանուկների համար։ Գրելաոճի տարբերություն, իհարկե, եղել է ամեն տարիքում։ Միշտ կարդացել եմ տարբեր հեղինակների գործեր, ուսումնասիրել և հետազոտել ոչ միայն կյանքը և մարդ արարածին, այլև թե ինչ է կատարվում արվեստում, գիտության և քաղաքականության մեջ։ Եվ դա արել եմ այն նպատակով, որ միշտ նույն ոճով նույն բանի մասին չգրեմ։ 

Read more...
 
Պաշտպան կլինեմ, իսկ արտակարգն ինձ համար երեխաներն են. Հանրապետության նախագահի տիկին Նունե Սարգսյանը ՅՈՒՆԻՍԵՖ-ի կողմից նշանակվել է երեխաների իրավունքների արտակարգ պաշտպան

Հանրապետության նախագահի տիկին Նունե Սարգսյանն այսօր Մեսրոպ Մաշտոցի անվան հին ձեռագրերի գիտահետազոտական ինստիտուտում (Մատենադարան) մասնակցել է Հայաստանում ՅՈՒՆԻՍԵՖ-ի գործունեության 25-ամյակին նվիրված հանդիսավոր միջոցառմանը: Հայաստանում ՅՈՒՆԻՍԵՖ-ի ներկայացուցիչ Տանյա Ռադոչայը հայտարարել է, որ տիկին Նունե Սարգսյանը ՅՈՒՆԻՍԵՖ-ի կողմից նշանակվել է երեխաների իրավունքների արտակարգ պաշտպան: «Երբ անցյալ տարի առաջին անգամ հանդիպեցի տիկին Սարգսյանին, նա անմիջապես մանկական հիմնադրամին իր աջակցությունը և օգնությունն առաջարկեց: Այնուհետև ես ծանոթացա նրա գործունեությանը, ավելի լավ ճանաչեցի նրան, տեղեկացա, որ մանկագիր է, որի գրքերը շատ հայտնի են և որոնք թարգմանվում են տարբեր լեզուներով՝ հնարավորություն ընձեռելով այլ մշակույթ կրող երեխաներին կարդալ դրանք,-ասել է Տանյա Ռադոչայը:- Տիկին Սարգսյանն այն անձանցից է, ով հոգ է տանում երեխաների մասին, փորձում է անել հնարավորը՝ երեխաների կյանքն ավելի լավը դարձնելու համար: Մեզ համար մեծ պատիվ է առաջարկել տիկին Սարգսյանին՝ ստանձնել երեխաների իրավունքների արտակարգ պաշտպանի առաքելությունը՝ այս կերպ միավորելով մեր ջանքերը և կարևորելով այս աշխատանքը ոչ միայն Հայաստանում, այլև Հայաստանից դուրս»: 

 

 
Հանրապետության նախագահի տիկին Նունե Սարգսյանին է փոխանցվել Հայկական Փի Ար ասոցիացիայի «Տարվա կին» մրցանակը

Հանրապետության նախագահի տիկին Նունե Սարգսյանին այսօր հանձնվել է Հայկական Փի Ար ասոցիացիայի «Տարվա կին» մրցանակը: Ասոցիացիայի նախագահ Աստղիկ Ավետիսյանը շնորհավորել է տիկին Սարգսյանին և փոխանցել խորհրդանշական արձանիկն ու պատվոգիրը:

Հանդիպման ընթացքում ասոցիացիայի նախագահը տեղեկություններ է ներկայացրել իրենց կազմակերպության գործունեության, ինչպես նաև հայկական PR մրցանակաբաշխության և մրցանակակիրների որոշման գործընթացի մասին: Աստղիկ Ավետիսյանի խոսքով՝ իրականացված հետազոտությունը ցույց է տվել, որ հասարակությունը գնահատում է Հանրապետության նախագահի տիկնոջ գործունեությունը, հատկապես՝ հաշմանդամություն և աուտիզմ ունեցող երեխաների նկատմամբ նրա կողմից ցուցաբերվող մշտական ուշադրությունը:

Տիկին Նունե Սարգսյանը շնորհակալություն է հայտնել մրցանակի համար: Նա կարևորել է ասոցիացիայի գործունեությունը և հետագա հաջողություններ մաղթել իրենց մասնագիտական աշխատանքում:

 

 
Հորինեք հեքիաթներ և հրապարակեք դրանք. Հանրապետության նախագահի տիկին Նունե Սարգսյանը փոքրիկներին է ներկայացրել իր և թոռնուհու հեղինակած գիրքը

Հանրապետության նախագահի տիկին Նունե Սարգսյանը «Զանգակ» գրատան «Աբովյան» մասնաճյուղում փոքրիկ ընթերցողներին և նրանց ծնողներին է ներկայացրել իր և թոռնուհու՝ Սավաննայի հեղինակած «Կապույտ գետաձիուկի և վարդագույն մկնիկի արկածները» գրքի հայերեն տարբերակը։
Նունե Սարգսյանը պատմել է հեքիաթի ստեղծման մասին, հատվածներ կարդացել գրքից եւ պատասխանել հետաքրքրասեր փոքրիկների հարցերին: «Երբ Սավաննան երեք տարեկան էր, ինձ խնդրեց հեքիաթ պատմել, և մենք սկսեցինք հեքիաթներ հորինել։ Երբ հորինում էինք, չէինք մտածում, որ մի օր գիրք կգրենք »,-պատմել է տիկին Սարգսյանը և ավելացրել. -Մի օր Սավաննային առաջարկեցի մեր պատմությունները գիրք դարձնել։ Ես նրան համոզեցի նաև, որ գրքի նկարներն ինքն անի։ Կենդանիներին ես ընտրեցի, իսկ անունները՝ Սավաննան»։
«Դուք էլ հորինեք հեքիաթներ և հրապարակեք դրանք»,-խոսքն ուղղելով փոքրիկներին՝ ասել է Նունե Սարգսյանը, իսկ ծնողներին խորհուրդ է տվել վաղ հասակից բացահայտել երեխաների տաղանդը։ «Քաջալերեք, որ մեր երեխաները չմոռանան արվեստը»,-նշել է նա։

Ոգևորված փոքրիկները տիկին Սարգսյանին պատմել են, թե իրենք ինչի մասին կցանկանային հեքիաթ գրել։ Նունե Սարգսյանը տեղեկացրել է, որ Սավաննայի հետ սկսել են աշխատել երկրորդ գրքի վրա, սակայն դեռևս չի բացահայտել հեքիաթի բովանդակությունը։

«Զանգակ» հրատարակչության մանկապատանեկան բաժնի խմբագիր Ալվարդ Ջիվանյանը նշել է, որ տպավորված է Նունե Սարգսյանի և Սավաննայի գրքով, քանի որ նրանք կարողացել են «խնամքով ներկայացնել երեխաների չարաճճիությունները»։ «Բոլորիս երեխաները պատերին նկարում են, բայց բոլորս չէ, որ դա նկատում ենք: Տիկին Սարգսյանը դա նկատել և բացառիկ խնամքով ամրագրել է»,-ասել է «Զանգակ» հրատարակչության ներկայացուցիչը և հույս հայտնել, որ տիկին Նունե Սարգսյանի հետ համագործակցությունը դեռ երկար կշարունակվի։ 

 
«StartPrev1234NextEnd»